分手嘅時候，曾經許下嘅承諾大部分都會消失得無影無蹤。喺愛情路上，無論幾愛一個人都好，都唔可以令自己變得卑微。謹記唔好做以下嘅五件事，讓回憶折磨自己！
1. No Contact Rules
假設分手之後你仍然愛佢嘅話，藕斷絲連只會令你活得更痛苦。所以我嘅自身經歷係，no contact rules至少要apply3個月，而且我真係straightly follow㗎！暫時unfollow所有newsfeed，收埋同delete以前所有對話同物件...放縱自己去留戀就等於對自己殘忍。至於分手後可唔可以做返朋友，就等傷口好番再講啦。能否放得低同要不要再連絡其實係兩碼事。已經放下，唔一定要再聯絡。可以再連絡，又唔見得已經放低。但係起碼，喺開頭最難捱嘅時候遠離“禍心”俾自己空間平靜，令心中小湖唔再激起任何漣漪備受折磨。
2. 唔好試圖向前度嘅朋友拉關係
有啲人一失戀，會好自然去搵對方嘅好友訴苦，表明自己其實有幾愛對方，但係”你哋個friend”又做咗啲過份嘅事去傷害自己，想朋友們為自己講句公道話，又或者想佢哋做中間人傳話比前度聽，令前度知道自己嘅近況同心意。其實唔好傻啦，作為朋友嘅佢哋當然會幫返自己人，而且傳話期間分分鐘可能產生更大誤會，我勸你要呻嘅都係搵返自己friend啦！
3. 唔好stalk前度
世上有一種自虐，叫做stalk自己個前度。人之所以犯賤，就係愈stalk愈心痛，愈心痛又要繼續stalk。其實大家都已經分咗手，關於前度嘅生活，知道又點唔知又點呢？就算佢同其他人約會都真係唔關你事。相反，作為單身俱樂部嘅你就更應該出去認識更多唔同嘅人，活喺前度陰影下只會令你更難走出情傷陰霾。好建議delete晒所有前度嘅嘢，或者換部新電話算...舊嘅唔去新嘅唔黎呀！
4. 唔好網絡公審前度
分手之後受情緒影響，實在有太多人會喺網絡上公審前度，甚至現場碰面仲要單打獨鬥對方。建議大家唔需要太堅持對與錯、是與非、應該與唔應該嘅問題。愛從來都好難分對錯，唔係所有嘅心動都係正好我愛你而你亦愛我。網絡上太多嘅負面情緒，只會搞到你好似怨婦一樣一啲都唔大方好唔吸引，最後更可能傷害其他人嘅情緒。
5. 唔好同前度上牀
大家就係因為唔啱先所以分開，唔係以為上番牀又會令佢回心轉意呀？試圖以性愛作為感情挽回嘅手段其實係愚蠢到極。其實何必為咗害怕寂寞而同錯嘅人藕斷絲連？如果你真係looking for closure，就麻煩你close the door同close your leg。雖然你可能會感到無限寂寞，但係你要承認結束先可以擁抱開始，新嘅門先會為你打開。
每對拍拖嘅情侶當然希望可以一生一世，但的確未必每段戀情都可以走到白頭。有時真係要遇上幾個錯的人，先會搵到對的人。記住The best is yet to come！
共勉之。
#女人像鹽
Search